مسلم بالوراثة

رغم انى مكنتش عاوزة ألعب دور الشخص اللى بينتقض كل الناس و كل التصرفات الا ان اللى بيحصل ده بمثابة القشة التى قسمت ظهر البعير... أنا عارفة ان كلامى مش هيعجب ناس كتير بس هو للاسف حقيقة لا يمكن انكارها و بنلمسها كل يوم فى حياتنا و لازم نحاول بجميع الطرق اننا نغير من نفسنا للأحسن و الا مش هتحصل النهضة اللى كلنا بنتمناها لوطنا....

.

.

.

لما يكون رد فعلك على الاساءة الموجهة للرسول هو الغضب العارم و العنف و الشتائم و الرغبة فى التخريب و قتل ناس ملهاش أى ذنب و حجتك ان ده كله بسبب حبك ليه و اقتداءا به و لأنك عندك غيرة على شخص الرسول رغم ان ده بيشوه صورة حبيبنا أمام العالم كله...اسمحلى اقولك انت مسلم بالوراثة...

كان ممكن تغضب برده و تحسن صورة الاسلام أمام العالم...كان ممكن تساعد اللى مش عارف مين هو محمد بن عبد الله انه يعرفه...كان ممكن تخلى العالم يكره المسيئون للاسلام...كان ممكن تتخلق بأخلاقه و سماحته و رقيه و تبهر العالم بتعاملاتك الراقية ...كان ممكن انك تطلب من مؤسسات حقوق الانسان ان ميكونش فيه سخرية على الأديان...كان ممكن تتعرف عليه أكتر و تحبه صح و ساعتها مكنتش هتبقى ...مسلم بالوراثة...

.

.

.

لما تبقى شايف ان أحداث 11 سبتمبر فى أمريكا اللى زهق فيها الآف الارواح الانسانية اللى ملهمش ذنب فى أى حاجة انها حلال فيهم...و ان الامريكان يستهلوا اكترمن كده.... و كل سنة تعمل شير لصور الحادث و تقول "فكرهم و نكد عليهم" و تكتب فوق الصور عقبالكوا كلكوا واحد واحد ... و حجتك انك مسلم و هما كفرة و سبب كل شر فى الارض...اسمحلى اقولك انت مسلم بالوراثة...

متضايق من أمريكا أوى ...يبقى اشتغل بجد و حاول اننا نبقى زيهم فى التقدم العلمى و الصناعى و الاجتماعى و كل جوانب الحياة...متصايق من الأمريكان عشان بيكرهوك...حاول تعمل حاجة تغير صورتهم عن الاسلام و المسلمين و ساعتها هيقفوا معاك و مش هيخلوا حكومتهم تضر المسلمين...متضايق من أمريكا أوى... يبقى متروحش هناك تتعلم و تشتغل و تنسى بلدك و تتعالى على أهلك...و لو عملت كل ده و لسه متضايق منهم فمفيش أى مبرر لفرحك ان ناس مدنيين أبرياء ماتوا منهم...حتى لو كانوا بيكرهوا الاسلام فهما فريسة لاتجاهات الحكومة و الاعلام عندهم...لو كنت فعلا غيران على الاسلام..كنت اهتميت بالموضوع ده و حاولت توصلهم الصورة الحقيقية ...و ساعتها مش هتبقى ...مسلم بالوراثة...

.

.

.

لما تبقى مبسوط انك مسلم و مفتخر بدينك دى حاجة كويسة أوى...لكن لما تبقى شايف ان أصحاب الديانات  الأخرى ملهمش حقوق العبادة و أداء طقوسهم الخاصة بيهم...و تبقى محسسهم انهم أقل منك و بتعمل أى حاجة تضايقهم...عشان انت صح و هما غلط ...و تضايق أما تعرف انهم وصلوا لمناصب أو بياخدوا حقوقهم و هيتم التعامل معاهم على انهم ناس عادية مش على انهم أقلية...اسمحلى أقولك انك مسلم بالوراثة...

لو صحيح بتحب دينك كنت عرفت انه أمرك انك تتعامل معاهم بالحسنى و تديهم كل حقوقهم...و كنت هتعرف ان الرسول كان ليه تعاملات كتير معاهم ,,,و كنت هتعرف أمير المؤمنين عمر الخطاب عمل ايه عشان أصحاب الديانات الأخرى...و بعدين لو فكرت مرة انك تحط نفسك مكانهم و تبقى عايش فى بلد معظم اللى فيها على غير ديانتك و بيتعاملوا معاك بنفس الطريقة...يا ترى كنت هتبقى مبسوط؟!!!!...على فكرة هما كمان شايفين ان دينهم صح و انت غلط...يعنى المفروض انك تكون داعية للدين بتصرفاتك معاهم...فكر...حاول..متبقاش مسلم بالوراثة....

.

.

.

لما تبقى نفسك الدولة الاسلامية ترجع تانى زى زمان و ترجع نهضة المسلمين ده شئ جميييييييييل ...لكن لما فى نفس الوقت بتقول لولادك ان الفلسطنيين بيكرهونا و ان احنا ملناش دعوة بيهم...و ان السعوديين و دول الخليج كلهم بيبصولنا من فوق ....و دول المغرب دول أصلا لسانهم معووج و ميعتبروش عرب ...و احنا ملناش دعوة بحد خلينا فى مصلحتنا بس...اسمحلى أقولك انك مسلم بالوراثة...

الدولة الاسلامية عمرها ما هترجع تاني بالطريقة دى...الدولة الاسلامية مش هترجع غير لما تعرّف ولادك معنى كلمة "وطن"...و لازم تقولهم ان فلسطين دى أرضنا و لازم نرجعها و انها قضية انسانية و اسلامية...و ان حتى لو فى ناس فى العرب بيكرهونا ...ف ده محصلش الا بسبب غفلتنا و دخول الاعداء بيننا و ان مهما حصل لازم نرجع و حدتنا و نحاول نصلح الوضع ده...و اننا مينفعش منقوفش جنبهم فى محنتهم....لو ربيت ولادك كده يبقى انت أكيد مش ...مسلم بالوراثة...

.

.

.

لو بتحب الاسلام بجد اعرف ان دينك من أرقى الأديان...

لو بتحب الاسلام بجد اعرف انه دين انسانى لا يرضى بأى شر أو أى اهانة أو ضرر لأى انسان حتى لو كان غير مسلم...

لو بتحب الاسلام بجد حاول تتعلم من رسولك السماحة و المرونة فى التعاملات...

لو بتحب الاسلام بجد يبقى اقرا و اعرف عنه اكتر و اكتر...

لو بتحب الاسلام بجد... اشتغل...و اتثقف فى كل مجالات الحياة...و متفقدش الأمل ...خليك صورة حلوة للاسلام...

لو بتحب الاسلام بجد...حب الخير لكل الناس بغض النظر عن شكلهم أو لونهم أو دينهم أو جنسيتهم...

لو بتحب الاسلام بجد...انشر قيّم الحب و السلام لكل اللى حواليك ...

لو بتحب الاسلام بجد...تخلق بأخلاق رسول الاسلام...

لاتكونوا مسلمون بالوراثة...كونوا مسلمون بأختياركم :)

قال رسول الله صلى الله عليه و سلم"لا يؤمن أحدكم حتى يحب لأخيه ما يحب لنفسه" ...يقصد بأخيه هنا أخيه الانسان :) .. و ليس أخيه المسلم..أو أخيه المصرى..أو أخيه الأبيض...استقيموا يرحمكم الله ..