الخميس، 9 أغسطس 2012

رمضان شهر الفرج ...مش الفرجة

فى قاعدة تأملية مع نفسى كده و انا صغيرة أدركت ان الانسان كائن نصفه أرضى و نصفه سماوى ...نصفه أرضى لأنه لديه احتياجات جسدية لازم يشبعها...محتاج ياكل و يشرب و ينام و يسد جميع شهواته الجسدية ...و نصفه سماوى لأنه به نفحة من روح الله ...فيحاول ان يسعى للكمال و ان يزكى روحه ...فنجد أننا نؤنب انفسنا على اى فعل قد يسئ لضمائرنا و يقلل من شأننا السماوى مثل الكذب او مضايقة الاخرين و غيرها من الافعال...و طبعا الناس انواع فهناك اللى بيحاول انه يزيد من جانبه السماوى و فيه اللى مش مركز خالص فى الموضوع...لكن الشئ الأكيد ان الانسان بطبيعته بيحب يرتقى الى جانبه السماوى.

رمضان شهر سماوى...ربنا عملنا شهر واحد فى السنة عشان نبقى على تواصل مع جانبنا السماوى و يدربنا فيه على التحكم فى شهواتنا و يحسسنا بكرمه علينا و معاناة غيرنا من الفقراء ...و عشان كده الطبيعى اننا نعبد الله و نرجو منه العفو و القرب منه فى هذا الشهر الكريم...و لأننا دولة اسلامية كان المفروض ان التلفزيون المصرى يكون ليه دور مساعد و لو مظهر بسيط من روح رمضان العطرة ده خصوصا بعد الثورة...لكن السنة دى التلفزيون فى رمضان كان غيييييييييييير!!!!...بداية من كمية البرامج التافهه اللى ملهاش اى تلاتين لازمة ...يعنى ايه استفادتى من ان المذيع يجيب فنان و يسأله أسئله شخصية تخصه وحده هو!!! ...لاء و يتفنن فى احراجه امام الكاميرات و المصور يجيب وشه بالجنب و من فوق و من جميع الاتجاهات و يحاصر ردود افعاله ...و السؤال..لييييييه!!...ليه التدخل فى خصوصيات انسان اخر و التحدث عنها امام 80 مليون بنى آدم او أكتر كمان!!!..و طبعا البرامج السخيفة اللى بيعملوا مقالب فى الناس و يصوروهم و هم غاضبون او خائفون او حانقون !!! ...ليه اهانة الانسان للانسان بالطريقة دى!!...و ليه البعض يعتبرها تسلية لوقته!!!...هل هناك فى ترويع الناس و اخافتهم  -زى ما بيحصل فى برنامج "رامز قلب الاسد"- أى تسلية!!!...هل تسليتنا هى اهانة و ترويع الآخرين!!

بلاش البرامج...المسلسلات بقى ...هل انا الوحيدة اللى لاحظت ان هناك تطور فى اللغة فى المسلسلات؟؟!!..لكنه تطور غير محمود بالمرة ...فأصبح عادى جدا تسمع ألفاظ نابية... طريقة حوار متدنية...صراخ و عراك طوال الوقت...و تجد ان كل الناس أوغاد ...كلهم بلطجية...كلهم يقومون بأعمال ضد القانون...كلهم على خلاف!!!...المسلسلات كلها تشع طاقة سلبية ...المسلسلات كلها بلا هدف...المسلسلات كلها تعكس عادات و تقاليد اما انها موجودة و هى غير محمودة ...أو انها دخيلة على مجتمعنا و لا تليق بنا...و يبادرنى ذهنى رغما عنى بالسؤال...ما الهدف من كل المسلسلات دى فى رمضان بالذات؟؟؟!!..أرجو أن أجد له اجابة يوما ما.

اللى فات ده كله حماده و مسلسل الزوجة الرابعة حماده تانى خالص :D ...أتسآل ما الذى قد يفكر به الشباب العاطل فى سن الحج فواز لما يجدون ما عنده من حظوظ الدنيا!! ...فهو عنده الكثير من المال يعمل به ما يشاء و يتزوج من تعجبه و يطلق اللى مش جايه على مزاجه...الأ يدخل ذلك فى قلوبهم الغل و الحقد!!..ثم ما هى معايير اختياره لشريكة حياته ووالدة أطفاله بالظبط ...الجمال!! ...يتزوج فتاة لأنه شافها و عجبته من مرة واحدة...أليس هذا أشبه بالتصرف الطفولى غير المسؤل!!...يدور المسلسل كله حول نقطة واحدة فقط..."كيف تكون كائن ارضى"....الا يرى المؤلف و المخرج ان هذا المسلسل قد يؤدى الى زيادة ظاهرة التحرش بين الشباب اصحاب النفوس المريضة ...الا يرى انه قد يعطى صورة خاطئة عن الرجال الأغنياء المتدنيين فتظل صورة المتدين ذو الزوجات الاربعة عالقة فى الاذهان....الا يرى انه قد يمثل قدوة خاطئة للاطفال و المراهقين فيصبح هدفهم الاول ان يكونوا مثل الحاج فواز...الا يرى انه يوسع الفجوة بين طبقات المجتمع لما يدخل من حقد و غل على قلوب الفقراء ....الا يرى ان مسلسله هذا بلا هدف اصلا!!!!

الشئ االذى يستعصى على فهمه هو كل تلك النقود التى صرفت على المسلسلات فى رمضان بينما هناك الملايين لا مأوى لهم و لا مأكل...ان كانت حجتكم "انه فنا و بالفن ترتقى الامم"...فأنتم لا تخدعون الا أنفسكم ..فهذا و الله ليس فنا ...فالفن الحق ان تعرض قضايا بلدك و ان تحاول ان تجد لها حلا...كنت آمل ان أجد مسلسلا يدعو للوحدة الوطنية و يوأد الفتنة الطائفية...أو آخر يرسخ قيما اجتماعية غائبة عنا ...أو يدعو لتقبل الرأى الآخر و التآخى مهما كانت خلافاتنا...أو أجد واحدا يعرف الناس دينهم الوسط بعيدا عن التطرف الشائع فى هذه الأيام ...هذا ما يسمى فنا ...و هذا ما ترتقى به الأمم.

الجمعة، 3 أغسطس 2012

الجواز مانيا "mania"

هو انا اللى غريبة و لا هما اللى غريبين؟؟ :D :D :D ....اصل اللى بيحصل ده مش عادى...و متناقض...و ملوش معنى ...وعجيب و لو فضلت اكمل كده مش هخلص!!!!
لما الاقى اهتمام كل قرايبى انى امتى هتجوز و اتخطبت ولا لاء و تتحول حياتى كلها الى دعوات و ابتهالات الى الله من كل اللى يقابلنى ان يرزقنى العريس الفظيع اللى محصلش لأنى ياعينى و صلت 23 و لسه متخطبتش و الناس بدأت تقلق كده مش هينفع !!...يا جماعة ده انا لسه مخلصة هندسة طازة ادعولى الاقى شغل كويس و ربنا يكرمنى فيه..مش تدعولى بالعريس!!! ...و تطلعلى طنط الجميلة اوى و تقول شغل !!! شغل ليه يا حبيبتى و هى الواحدة ليها ايه غير بيت جوزها ....و ساعتها حسيت انى هقلب على دنيا سمير غانم و هى "بتردح" لأحمد مكى فى فيلم طير انت ...امال انا كنت دخلت هندسة و اتعصرت من الدكاترة و شيتات المعيدين و ميد ترمات و فينال اد كده و نطلع مكتبات و نصور ورق اد كده  درست انواع من الرياضيات و الفيزياء و الميكانيكا و غيرها و غيرهاااااااااااا لييييييييييييييييييييييييييييه ؟؟!! :@ :@ :@...ازاى يعنى بعد ما شفت كل ده زيى زى اى ولد يبقى اول همى بعد خروجى من الكلية هو بيت جوزى!!!...طيب ما كنت دخلت آداب و لا تربية اقتصاد منزلى احسن..على الأقل هتبقى مفيدة اكتر عشان بيت جوزى :D

و يأتى التناقض بأه.... كل الطنطات اللى نفسهم انى اتجوز دول فى نفس الحوار اللى بيدعولى فيه بالعريس ده بس بعديها بشويه كل واحدة فيهم تدعى على جوزها و الرجالة كلهم و قد تسمع كلمة "قطعو كلهم" كذا مرة و تلاقى معظمهم بيقول بنبرة استسلام و خضوع "ياختى الرجالة كلهم كده" و "مفيش حاجة بتعجبهم"...فأستعجب أنا من النتاقض العجيب المريب ده..الناس دى عندها شيزوفرينيا و لا بارانويا ولا ايه نظامهم بالظبط!!!!... مش كانو لسه من شوية بيدعولى بالعريس المخلِص!! ...بيدعو علي الرجالة كلهم دلوقتى !! انتو لحقتو طيب :D :D ...و تلاقيهم بأه عمالين يحكو على بنت الجيران اللى اتجوزت واحد مفيهوش غلطة و بعد الجواز عمل و خلى فيها ويصعب عليهم حالها و عيشتها و اللى جرالها!!!

نيجى بأه للصديقات...فجأة لقيت موضوع الساعة عند أى بنت بتتخرج ...الجواز !! ..و يا و كستها و ياخيبتها اللى معرفتش تصطاد عريس من الكلية...أمال يعنى هتجيبو منين!!..طيب و ماله ايه المشكلة اما تكون دى حاجة تهتم بيها البنت و نفسها فيها...قلت أسألهم بقى هيموتوا و يتجوزوا ليه...و يا ريتنى ما سألت :D :D ...اللى قالتلى نفسى اتخطب كده و خطيبى يجبلى هدايا دباديب و قلوب حمرا و أعيش جو الخطوبة ...و اللى قالتلى الرجالة قربت تخلص من البلد لازم نلحقلنا حد !!!! ...و اللى قالتلى دى سنة الحياة امال لو متجوزتش هعمل ايه يعنى!!!!!!...و طبعا لازم واحدة تقول القول الشهير هى الواحدة ليها ايه غير بيت جوزها فى الاخر :@ :@ :@  ...شكلهم مصممين يجيبولى الضغط :D ....واصدمتاه هما دول امهات المستقبل اللى هيطلعولنا الجيل اللى هيبنى بلدنا -فى المشمش طبعا :D - بالمنظر ده مش هنبنى البلد ده احنا اخرنا نبنى بيت رملة على البحر :D :D ...و يطرح السؤال نفسه برده هو انا اللى غريبة ولا هما اللى غريبين؟؟!!!!! :D
.
.
.
نتكلم جد بأه..
المشكلة تكمن فى ان مهما كان تعليم الولد فهو شايف ان اى بنت تتمناه لانه راجل - من وجهة نظره الخاصة و خلفيته الثقافية- و معنى الرجوله يختلف بين الولاد بأه و لو شفت تصرفات كل واحد حسب رؤيته الخاصة للرجولة تصاب بالصدمة ...فمنهم اللى شايف ان العصبية و النرفزة من غير سبب واضح ...رجولة...و فى اللى شايف انه لما مياخدش رأى مراته فى حاجة لأنها مجرد واحدة ست و أكيد مش هتبقى بتفهم أكتر منه ...رجولة...و فى اللى شايف انها لما تبقى تعبانة و تقوم تعملو اكله و تاخد بالها من بيتها و هو يتأمر عليها و ميفكرش انه يساعدها ....رجولة...و فى اللى شايف انه لما يغير عليها من كل اللى حواليها و يضيق عليها حياتها ...رجولة...و فى اللى شايف انه لما يعاملها وحش و يديها على دماغها زى ما بيقولوا هتمشى عدل و برده شايف ان دى ...رجولة...و فى شايف ان اللى يذلها ليل نهار بـ "الرجال قوامون على النساء" و " مثنى و ثلاث و رباع" و "ناقصات عقل و دين" دى برده ....رجولة...و فى اللى شايف انه لما يغيظها و يشعل غيرتها بالكلام على جمال و حسن غيرها ...رجولة...و فى اللى شايف انه ياخد حقوق الطاعة و الوفاء كاملة منها و ميديهاش ادنى حقوقها ...رجولة !!!!!!!!!!! و غيرها الكثير...رغم انى لم اجد فى السيرة النبويه اى من الافعال دى كان بيقوم بها احسن الخلق و المفروض انه قدوتنا !!

خلاصة القول انا مش انسانه كاملة و لاابحث عن الكمال ..لكن مش عاوزة فى يوم من الايام اتجوز واحد عشان بيدور على واحدة بتطبخ و تكنس و تمسح و تكون حلوة و محترمة و الحاجات دى و بس !!!...انا دخلت المدرسة و درست فى الكلية زى اى واحد و قريت كتب كتير يعنى عندى فكر وعندى احلام و عندى طموحات زيه برده..و من حقى انى اسعى انى احققها ...مينفعش بعد كده يكون العريس بيفاضل بينى و بين واحدة تانية يشوف مين فينا اللى بتعرف تطبخ عشان يتجوزها !!! ...مرة واحدة قالتلى" لازم تبقى عارفة ان مهما كان معاكى من تعليم و شهادات مش هما دول اللى هيجوزوكى...لازم تبقى عارفة ازاى تشتغلى فى البيت"!!!!!....هل الرجال فى هذا الزمان يبحثون عن طباخات و شغالات لبيوتهم!!!!...هل يعلمون انه لا يوجد نص قرآنى و لا حديث نبوى  يأمر المرأة بأن تخدم زوجها و ان السنه ان الراجل يجيب لمراته واحدة تساعدها و انما هى تقوم باداء هذا فضلا منها و ان يكون فيه مشاركة ما بين الزوجين فى الاعمال المنزلية !!!...انا هنا مش بدعى الستات تبطل شغل البيت بالعكس ..لكن برفض انى اكون اختيار واحد عشان بعرف اطبخ و اقوم بالاعمال المنزلية بس او انه عاوز يتجوز و خلاص!!...غير عابئ بأى حاجة تانية تستحق الاهتمام...

ان الرجل الذى اريده و لن ارتضى لنفسى غيره يكد و يعمل بجد لتحقيق طموحات و آمال كثيرة غير عابئ بأى معوقات تعيق طريقه....أريده لا يثنيه بعض الظلمات فى الطريق... أريده ان يختارنى لأننا متفقين فى احلامنا و طموحاتنا على رغم اختلافها و لأنى السكن بالنسبة له و لأننى سأعينه فى الطريق مثلما سيعيننى فى طريقى ...أريده ان يقيم حياتنا على مبادئ المودة و الرحمة...أريده لديه معنى لحياته و هدفا بها...أريده قواما بمعناها الحقيقى ...أريده يهتم لأمرى مثلما اهتم بأمره....أريده ان يصحح لى فعلى ان اخطأت ...أريده أن يعيننى على قربى من الله...أريده أن يتحمل أخطائى و هفواتى مثلما سأحتمل أخطاءه...أريده باحثا عن انسانة لا عن طباخة أو تابعة له..

اقولها واضحة لن ابنى حياتى و سعادتى على وجود شخص قد يكون غير موجود بها من الاصل...سأظل أحاول تحقيق أحلامى حتى النهاية ...فان شاء لى ربى سيأتى صاحب النصيب فى الوقت المناسب...و ان لم يشأ فهذا قدره و سأكون من الراضين به ان شاء الله...و كفاية زن على الودان بقى قرفتونا :D :D :D